ኣእዋም ተኣኪቦም ንጉስ ኣብ ልዕሊኦም ከንግሱ ተሰማምዑ'ሞ፡ ንተኽሊ ወይኒ "ንስኻ ንገሰና" በሉዎ። ወይኒ ግና፡ "ኣብ ልዕሌኹም ንክነግስ ኢለስ፡ ነቲ ንልቢ ሰባት ዘሓጉስ ተፈታዊ ጣዕመይ ክገድፍ፧ ይትረፈኒ ደኣ" በለ። ቀጺሎም ናብ በለስ ከዱ እሞ፡ "በለስ ንዓ ንገሰና" በሉዎ። በለስ ብግዲኡ፡ ኣብ ልዕሌኹም ክነግስ ኢለስ ነቲ ተፈታዊ ጣዕመይ ክገድፍ፧ ይትረፈኒ" በለ፡፡ ብድሕሪኡ ናብ እሾኽ ከይዶም፡ "ንገሰና" በሉዎ። ንሱ ግን፡ "ኣነ ክነግሰኩም እንተኾይነ ኩልኻትኩም ኣብ ትሕተይ እተዉ። ካብ ትእዛዘይ ምስእትወጹ ግና ሓዊ ይመጽእ'ሞ ይበልዓኩም።" በሎም። ሕራይ ከኣ በሉ። ሽዑ ከምቲ፡ ኣቦታትና ክምስሉ "ምስ እሾኽ ዝተጸግዐ ቆልቋልሲ ክነዝዕ ይነብር"፤ ኣምሓራ ክምስሉ እውን "ከእሾህ ጋር የተጠጋ ቁልቋል ሲያለቅስ ይኖራል" ዝብልዎ ከኣ ኮነ።

ኤርትራውያን እውን እዚ ዝዓይነቱ ምርጫ ኢና ወሲድና። ነቶም "ናይ ጥበብ መጀመርታ፡ ንእግዚኣብሄር ምፍራህ እዩ" ዝበሉ "የጥፍእኩም" ኢልና፡ በቲ ዝወርዶም ዝነበረ ግፍዕታት ጸባ ሰቲና፡ ካብ ገዛእ ሃገሮም ብዘይፍታዎም ሰጒግናዮም። ነቶም ሕጂ ኣብ ስልጣን ዘለዉ ኣካላት ከኣ፡ "መጺእካለይዶ ክጽበየካ" እናበልና ተቐቢልናዮም። ስለዚ ሕጂ ነገር ኩሉ እናከፍኣ ምስ ከደ ኩላትና እቲ ዝትንክፈና ዘይመሰለና ሽግር ኣብ ኣፍ ደገ ገዛና ምስ መጸ፡ ዲሞክራሲ ከም ዘየለ ተረዲኡና፡ እምበር ከምቲ "ገብረ እንታይ ገበረ፧ ዝበሉዎ ኢዩ ዝገበረ" ዝበሃል፡ እዚ ስርዓት እዚስ ሓድሽ ዝገበሮ ነገር የለን። ከምቲ "ድሙስ ነይገድፍ ግብሪ እሙ" ዝበሃል፡ እታ ዝኽእላን ዝፈልጣን እዩ ዝገብር ዘሎ። ስለዚ ናይዚ ኩሉ ኣብ ሃገርና ወሪዱ ዘሎ ሽግር እንኮ መፍትሒኡ ገጽና ናብ እግዚኣብሄር ምምላስ እዩ።

እግዚኣብሄር ንህዝብና ብዓይኒ ምሕረት ይጠምት።