1. ብመልክዕ ሃገራዊ ዋዕላታትን፡ ጉባኤታትን፡ ኣኼባታትን ዝውሰኑ ጉዳያት ዝያዳ ዲሞክራሲያዊ ሰረት ኣለዎም ኢለ እኣምን። ኣብ ኽምዚ ዝኣመስለ ጉዳያት ሓደ ርእይቶ ወይ ዝምባሌ ክዕብልል ስለ ዝይከእል ንተሳተፍቲ ኣብ እንካን ሃባን ዘፍቅድ ውረድ ደይብ ተመርኲሾም ኣብ ንኹሉ ዝጥርንፍ ማእከላይ ፍታሕ ክሰማምዑ ዘኽእል መስርሕ የምርሖም።
2. ዕላማ ናይዚ ሃገራዊ ዋዕላ ንዲሞክራሲያዊ ለውጢ ስለ ዝኾነ ኣብ ኤርትራ ንዚ ዘሎ ዲክታቶርያዊ ስርዓት ንምልጋስ ተኣኪብካ እትገብሮ ካብ ብውልቀ ውድባት ዝግበር ጉባኤታትን፡ ዋዕላታትን፡ ኣኼባታትን ዚያዳ ኣድማዕነትን፡ ዓቢ ምልኣትን ዘለዎ መስርሕ ክኸውን እዩ። ልዕሊ ኩሉ ድማ ተሳትፎ ሕዝቢ ኣብ ምምስራት ንኹሉ እትሓቁፍ ዲሞክራሲያዊት ኤርትራ የረጋግጽ ብምህላዉ ፍሉይ ታሪኻዊ ኣገዳስነት ክህልዎ እዩ።
3. እዚ ሃገራዊ ዋዕላ እዚ ኣብዚ ተታሓሒዝናዮ ዘሎና ቃልሲ ንመጀመርያ ጊዜ ዝግበር ዘሎ ኮይኑ፡ ነቲ ብሰንኪ ባዕዳውያንን፡ ዲክታቶርያውያንን ዓመጽቲ ተሪፉ ንዝነበረ ሕዝባዊ ባህልና “ሽግራትና ብዋዕላታት ናይ ምፍታሕ” ምዕቡል ልምዲ ዘሕድስ መስርሕ ኮይኑ፡ እዚ ዋዕላ እዚ ፈላሚ ኾይኑ፡ ንመጻኢ ዋዕላታት ንምክያድ መስረት ዘንበር መስርሕ እዩ።
4. ሓደ ካብቲ ሽግርና ግን ገለ ካባና ‘ንሃገራዊ’ ንዝብል ጥምሮ ሓሳብ ምስ ‘ፖሊቲካዊ ውክልና’ ዝብል ይሓዋውስዎ። ብሸነኸይ ሃገራዊ ዘብሎ ምኽንያት፡ ካብ ኩሉ ሸነኻት ናይ ሃገርና ይሳተፍዎ ስለ ዘለዉ ድኣ እምበር ንኹሉ ስለ ዝውከለ ኣይኮነን። ብዓቢኡ እቲ ተጠቃሚ ዲሞክራሲ ክኸውን ንጽበዮ ዘሎና ኣብ ትሕቲ ዲክታቶርነት ዝሳቀ ዘሎ ሕዝቢ ኤርትራ ብቀጥታ ክሳተፎ ይኽእል ከምዘየሎ ካብ ኩልና ዝተሰወረ ኣይኮነን። ኮይኑ ግን ብዙሕ ሸነኻት ናይ ሕብረተስብና ይሳተፍዎ ስለ ዘለዉ፡ ንኹሎም ሸነኻትን፡ ዝምባሌታትን ሕዝብና ዝውክል ዋዕላ ምኻኑ ዘጠራጥር ኣይኮነን ዝብል እምነት ኣሎኒ።

ንኹሎም ነዚ ዋዕላ ንምዕዋት ዝቃለሱ ምስጋናይ ብምቅራብ፡ ደጊመ፡ ርሑስ ዋዕላ ይግበረልና፡ ቀዳዊና ይግበሮ ክብል እፈቱ።