ብቕዓት
ን2010ን መጻኢን
ዘመን ይመጽእ ዘመን ይትካእ።

ኣብ ትሕቲ ጽላል ደሞክራሲን ፍትሕን ሰላምን ስለንነብር ዘለና በዚ ኣጋጢሙና ዘሎ ጸጋ እናመስገና፤ ዝሓለፈ ዓመት 2009 ኣብታ እተወለድናላ ሃገረ ኤርትራን ካልኦት ናይ ዓለም ሃገራት ዝተረኽበ፣ ሓዘንን ሞትን ስደትን ባርነትን ሕማምን ሓደጋን መስኪርና ኢና። ናይ ውሑዳት ናይ ስልጣን ድሪኺት ዘስዕቦ ናይ ብዙሓት ግዳይነት ንኽንፈልጥን ኽፍለጥን ክንርዳእን ከንርድእን ምእንቲ፣ ኣመጻጽእኡን ናይ መጻኢ ኣካይዳኡን እውን፣ ንምክትታል እቲ ጉዳይ ክዝርዘር ናይ ግድን ኮይኑ ዝረኸብዎ ጸሓፍትን ደረስትን ናይ ወብሳይት ሚድያ ኣሰናዳእትን ብዓቕሞም ፍልጠትን ሓበሬታን ኣብ ምዝርጋሕ ክሳተፉ ጸኒሖም። እዚ ድማ ፍልጠትን ክእለትን፣ ናይ ምዝርጋሕ ዕድልን ጠቕሚን፣ ኣተገባብርኡን ፍሉይነት ናይዚ ንነብረሉ ዘለና ናይ 21 ዘመን ተርእዮ እዩ ዘንጸባርቐልና ዘሎ። እንነብረሉ ሃገር(ራት) ናይ ከምድላይና ክንነጥፍ ዘኽእል ባይታ ንምጥራይ፣ ብቕዓት ዘለዎም ሰባት ተተካእትን ትካላትን ኣንቢሮም ስለዝኸዱ፣ ናቶም ጻማ ኣብ ወጻኢ እንቕመጥ ሰባት ኣብ ዘንጸፉልና ኽንምዕብልን ነጻ ኮይንና ክንቀሳቐስን፣ ናይ ምዝራብን ምጽሓፍን መሰላትና ተዓቒቡ ናይ ምንባርና ጉዳይ እውን መከላኸሊ ኣብ ዘለዎ ጽላል ክንሳለ በቒዕና ኣለና።

ናይ ሎሚ መልእኽቲ “ብቕዓት” ዝበልናሉ ምኽንያት እምበኣር ደቀ ሰብ ተኸታታሊ ናይ ግዳይነት ኩነት ዘጋጥሞም እንተኾይኑ ናይ ገዛእ ርእሶም ናይ ምክልኻል ዓቕሚ ምምዕባል የድልዮም እዩ። እንተኾነ ግን ናይ ዘድልየካን ዘየድለየካን፣ ዝምእምኣካን ዘይምእምኣካን፣ ዝጠቕመካን ዘይጠቕመካን፣ ኣብ መዓልታዊ ህይወት ዘዋጽኣካን ዘይዋጽኣካን ናይ ምፍላጥን ናይ ምትግባርን ብቕዓት ኣሎዶ የለን ኮይኑ ረኺናዮ እቲ ሕቶ። ብቕዓት እንታይ እዩ ንዝብል ኣርኣስቲ እምበኣር ምስ መእተዊ ናይ 2010 ክንላለዮ ተበጊስና ኣለና። ከም ሕዝቢ እውን ንኽትህሉ ብቕዓት የድሊ ንብል።  
ርሑስ ሓድሽ ዓመት 2010 ንምነየልኩም።