ናይ ግዜና ናይዚ እዋን
ውልቀ መላኽ ዕቡይ ፈርዖን
ሕንቁቕ ጣኦት ዓርኪ ሰይጣን
ሓዋርያቱ ፈገር-መገር
መዘና መንግስቱ ኢደኣሚን።
ስመ-ነቢይ ተሰኪሙ
ግርማ-ኣዳም ተሰሊሙ
ግብረ-እከይ ተዓሚሙ።
ስራውሩ ጨናፍሩ
ኣሳላጥቲ መጋብሩ
ኣጫፈርቲ ሃሱሳቱ
ኣጣቓዕቲ መናሽውቱ
ፈቐድኡ መዛርግቱ
መዋድስቱ መሻርኽቱ
መሓጥእቱ መዛምርቱ
መጉባዕባዕቲ መቓትልቱ
እንክውቀስ ኣመኽነይቱ
“ጅግና”-ሎሞ ተገዘእቱ።
ውሽጢ-ሃገር ስግር ባሕሪ
ነውረኛታት ቃርማ-ሸሪ
ጸረ-ህዝቢ ጸረ-ሰላም
ጸረ-ፍትሒ ሰንካም-መንካም
ጸረ-መሰል ግናይ-ሃርጓም
ይመስገኖም! ነዚኦም ሒዙ
በትሩ ነዊሕ ምስ ምዘዙ።
ባዕሉ ራእሲ ፊት-ኣውራሪ
ተናዳፊ ተናጋሪ
ተናኻሲ ተማዳሪ
ሕሱም-ሓኽሊ ተሳባሪ
ትዕቢተኛ ጸቢብ-ዓቕሊ
ደረቐኛ ክናብ-በቕሊ።
መሬት-ህዝቢ ክህግሮ
ሸዊት-ሂወት ክቛመሮ
ዝተማህረ ክደንቅሮ
ዝዘገነ ክድስክሎ
ዝዓመረ ኪጽልጽሎ
ዝዓምበበ እንክሕርሮ
ቡጭቕ ኢሉ ዒምዘለ’ደሎ?
ኣየ ስረ! መን ክደፍሮ።
ዝባን መንግስቲ ቅጥዒ’ብሉ
ይግባይ የለ ዝሰምዓሉ
ስርዓት ሕጊ ፍትሒ የብሉ።
ሓባር ከሳስ ገዛዝ ኣሳር
ሸምጋል ፈራድ መስካር መኻር
ሕሱም ዉላድ ስሱዕ ተኹላ
ኩርካሕ መደብ ርጉም ጊላ።
ጉዳም ፍጥረት ኩሉ ባዕሉ
ኣየ ጣቋ ክኽእለሉ
ዓደ ንስቲ ሓደ ባዕሉ
ኣርሓ ገዛ ኣያ ኩሉ
እንተንዲሩ እንተህሊሉ
ከልካል-ዓጋት መላስ ነይብሉ።
“ብመንገደይ ዝብልኩዋ
ትቕዶ-ኣይትቕዶ ሰዓብዋ”
“ኣይፋል” ቴልኩም ትረኽብዋ
ትኣትውዋ ዘይትወጽዋ
ዝወለደት ተቕብጽዋ።
ኣየውዕልኩም ኣብ ቁጠዐይ
ኣይጽንሕኩም ኣብ መገደይ
በሉ ድኣ ኣለይ-መለይ
ኣይትረስዑ “ክቡር ጎይታይ”
ድፍእ-ስጥሕ ትሕቲ-እግረይ።
ኩል-ብ-ኢዱ ኩሉ-ባዕሉ
እንተምጺኡ እንተንቂሉ
ዕጭ-ሓንፊፉ እንተፈሊሉ
ከም ጋሻ ውሕጅ ገማጢሉ
እንዳስሓቀ ኣዳህሊሉ
ከይወስደኩም ተኣለይሉ
ሓድው ሕጽቢ ውደይሉ
ዲጋ-ዛላ ግበርሉ
ገመድ-ቀይዲ እሰርሉ
ያዕ በልዎ ኮርይሉ
ኮርሽኡ ነውኑዉሉ
ተትመልሶ ልበ-ዓቕሉ
ድጋም-ዳዊት ዘይዓብሰሉ
ውዳሴ-ማርያም ፋይዳ-ብሉ።
