መን ኢዩ ኣሳሪ መንዩኽ ተኣሳሪ
መንዩ ተንበርካኺ መንዩኸ መካቲ
ትፈልጦ ኢኻ ባዕልኻ ኣብ ግዜ ኩናት ከመይ ከም ዝነበረ

መን ከም ዝመከተ መን ከም ዘድሓርሓረ
መን ኣብ እንዳ ስዋ ኣብ ባር ከም ዝነበረ
መን ኣንዊሑ ብምሕሳብ ንረብሓ ሃገር ዝገበረ
ንረብሓ ህዝቢ ዝኸውን ኣግፊሑ ዝመኸረ
መንዩኽ በሽካዕላል ዘየድሊ ቃላት ዝወርወረ
ዘየድሊ ብድዐ ጌሩ ዝመደረ ዝገዓረ!!

ኩሉ እኮ----- ኣይተረስዐን

ናይ ትማሊ ተዘክሮዩ ይግባእ ክኽዘን!!
ኣሎ ኣብ መዘክር ማህደር ተኸዲኑ ብመኽደን::

ዘበነ መኸተ ሓሊፉዩ ተባሂሉ
ሎሚ ከኣ ሙዚቃ ተቐይሩ
ልምዓትን ህንጻ ሃገርን ተባሂሉ
ሓዲሽ ፕሮጀክት ብሽምካ ዋርሳይ ይከኣሎ ተባሂሉ
ኣየ ስም ክጽብቕ ሃየ እሞ ኣስተውዕለሉ!!

ገዛኻ ዓጺኻ ግራትካ ኣቓዲርካ
ስራሕካ ገዲፍካ ትካልካ ኣደስኪልካ

ቆፎ ናይ ህ.ግ.ደ.ፍ. ክትመልእ ተቐሲብካ
ጽርግያ ክትምድምድ ክትጸርግ ተኣዚዝካ
ዲጋታት ካናለታት ክትሰርሕ ደም ሪሂጽካ
ብዘይ ዋጋ ብዘይ ደሞወዝ ባርያ ተቆጺርካ!!
ሃየባ ሕጂስ ተለዓል ይኣኽለካ!!

ስድራኻን ደቅኻን ጸምይዎምዩ ዘሎ
ዋርሳይ ይከኣሎ ሕጂውን ይኣኽለካ በሎ
ኣይፋለይን እብለይ በሎ::

ከምዚ ናይ ሎሚ
ኣብ መግዛእቲ ጥልያን
ብጅምላ ዕስክርና ምስተገብረ
ስድራቤታት በይነን ምስተረፋ
ብዓለደይ ምስ ብዓል ኣብሻይ
ብዓል መዓሮ ምስ ብዓል ሳንዳይ
ከምዚ ኢለን ደረፋ

ብዓል ኣቦይ ኩሎም ነጊሶም
ብዓል ኣያይ ኩሎም ነጊሶም
ብዓል ዑሉም ጨላይ ኣብዑርና----መንዩ ዝሓርሶም???

ኣብቲ ግዜቲ ካልእ ክብላን ክገብራን ስለ ዘይክእላን ናይ ሎሚ ምሕደራ ህ.ግ.ድ.ፍ

ከምኡ ዘድርፍን ዘቖዝምን ኮይኑ ይርከብ::

ዘለኣለማዊ ዝኽርን ክብርን ንስዉኣትና
ፍትሕን ሰላምን ንህዝብና