መንግስቲ ኤርትራ፡ ብወገን ሩባ ሓዳስን ከባቢኡን ብሕሱም ግዝኣት ህግደፍ ዓቕሎም ብዝጸንቀቑ ሃገራውያን ዝተወለዓሉ ብረታዊ ቃልሲ ንምግታእ፡ ንህዝቢ ብህዝቢ ንምጥፋእ ዝዓነዉ ግዝኣታት ባዕዲ ዝተጠቕሙሉ “ፈላሊኻ ግዛእ’’ ዝብል ዝኣረገ ሜላ ብምጥቃም፡ እንተኾይንሉ ሕጂ'ውን ንህዝቢ ጽንዓደግለን ጣሩዓን ንምፍላስ ብምሕላን፡ ብደቂ ጣሩዓ ዝተፈጸመ ብዝመስል መንገዲ፡ ተወልደብርሃን ተስፋይ ንዝተባህለ ወዲ 25 ዓመት መንእሰይ ብዘዝካክሕ ኣገባብ ዳቡራ ኣብ ዝተባህለ ቦታ፡ ብ15 መስከረም ከምዝቐተሎ ካብቲ ቦታ ተገሊጹ።

እዚ ዘስካሕክሕ ፍጻሜ'ዚ፡ መንግስቲ ኤርትራ ህዝቢ ብመሰረታዊ ሽግራቱ ተወጢሩ ንለውጢ ብሓባር ንከይወፍር ኣብ ሞንጎኡ ዝጠፍአ ሓዊ ብምቑስቋስ ብሓድነት ንኸይምክት ኣቓልቡኡ ንምእላይ ዝወሰዶ ናይ ቀቢጸ-ተስፋ ኣነዋሪ ተግባር ኢዩ። ህዝብታት ጽንዓደግለን ጣሩዓን ነዚ ኣስተውዒሎም ካብ ሕድሕድ ምፍሳስ ደም ክጥንቀቑ ንምሕጸንን ረዚን ምሕጽንታ ነቕርብን።

በዚ ኣጋጣሚ፡ ህዝቢ ኤርትራ ብሓፈሻ፡ መፍቶ ናይዚ ጸላኢ ህዝቢ ኤርትራ ምዃኑ ኣጸቢቑ ዘግሃደ፤ ንኤርትራን ንህዝባን ከጽንት ዝተዓጥቀ ጉጅለ ህግደፍ ካብ ምዃን ክጥንቀቕን ከስተውዕልን ነተሓሳስብ። ጉጅለ ህግደፍ፡ ዋላ’ኳ ኣብ ውሽጢ ሃገር ዘሎ ህዝቢ ኤርትራ፡ ንተግባራቱ ብቐረባ ስለዝከታተሎ እንተዘይተዓሸወሉ፤ ኣብ ወጻኢ ሃገራት፡ ብውሽጠ-ውሽጢ ሃሱሳቱ ብምውፋር፡ ኣብ መንጎ ኤርትራውያን፡ ኣውራጃዊ፡ ሃይማኖታዊ፡ ቀቢላውን እንዳውን ዘይነበረ ጽልኢ ብምስዋር ኣብ መንጎ ኣሕዋት ጽልእን ምጥርጣርን ንኸስፍን ይጽዕር ከምዘሎ ኩሉ መስተውዓሊ ዝፈልጦ ኢዩ።