ኣብ ርእይቶታት ኣዝማሪኖ እንግሊዝ እትጽሕፍ “ማርያም” ዝተባህለት ሓድሽ ወረ ነጊራ። ዋዛ ክደልዩ ሃሰው ክብሉ ዝውዕሉ (ካልእ ስራሕ የብሎምን)፣ ቁምነገር መሲሉ ስለዝተሰምዖም ጨረታ የለን ድዩ? ንበይና ድያ ክትወስዶ? ክብሉ ሓተቱ። ስም መርበብ ኣዝማሪኖ፣ ብጥቅምቲ 2010 ፍቓድ ግዜኡ ክወድቕ እዩ’ሞ ኣብ ነጻ ዕዳጋ ርእሰ ማልነት ክኣቱ ስለዝኾነ፣ “ኣነ ክወስዶ እየ” ዘስምዕ እያ ዝጸሓፈት። ዓምዲ ዋዛ፣ ምናልባት “ማርያም” ን”ኣዝማሪኖ” እንተወሰደት ካልእ ስም ክንህባ ዝብል ውድድር ኣካይዶም ቀዳመይቲ “ተበገስ” ሲዒራ ኣላ።

ተወዳደርቲ፡ 10ይቲ፣ መዓስ? 9ይቲ = ዘይሕለል፣ 8ይቲ = ዘይደክም፣ 7ይቲ = ዘይግድስ፣ 6ይቲ = ብሕጊ፣ 5ይቲ = ዘይርብርብ፣ 4ይቲ = መሰልና ደሊና፣ 3ይቲ = ርእሰ ኸተማና፣ 2ይቲ ኣዝማሪና ነይረን።

ስም እንታይ ኢዩ?

ጁልየት ንሮመዮ “ስም እንታይ ኢዩ? ዕምባባ ጽገረዳ ካልእ ስም እንተዝዋሃቦ ሽትኡ ጥዑም ምዃኑ ኣይተርፍን” ።

ናይ ክልቲኦም ቤተ ሰብ ባእሲ ንፍቕሮም መሰናኽል ምስ ኮነ፣ ስሙን ስም ስድርኡን ኣይደልን እየ ኢሉ ምስነገራ ዝመለሰትሉ……

Juliet:
"What's in a name? That which we call a rose
By any other name would smell as sweet."
Romeo and Juliet (II, ii, 1-2)

ምጽሕታር “ማርያም” ብኹለንትንኡ ክፋእን ጨረምረምን ኣለዎ። ገለ ንሓንቲ ካልእ ጻሕታሪት ነገር የዘክር?? እተን ብቐይሕ ሕብሪ ተለኽየን ኣብ ጎደና 22 ከመሓድራ ዝወዓላ ኣጻፋር ዶኾን ይኾና? እንድዒ!

ስለምንታይ “ማርያም”? እቲ ስነ ምግባር ዘይብሉ ብውዲትን ብሽርሒን ብምስጢርን ኣብ ሃገር ዝኣተወ፣ ካብቲ ብዙሕ ዝጥቀመሉ ስልቲ፣ ኤርትራውያን ውርዙዋትን ነውሪ ዘይቅበሉን እዮም ዝብል ካብ ናይ 40 ዓመት ትዕዝብቱ ይፈልጥ ኢዩ። እቲ (ካብ “ንሱ” ድሕሪ ሎሚ “እቲ” ክበሃል ተወሲኑሉ ዘሎ) ግን ኣይግድሶን እዩ።  ስጋእ ዝብሉሉ ነገር ኩላ እዩ ዘውጽእ። ኣጸያፊ ንዕዑ መሳርሒ ኢዩ። ነውሪ እውን ከምኡ። ኣብ ኩሉ ዓለም ዘንብቦ ቅርዓት ኢንተርነት፣ ዘይንቡርን ክፉእን ኮመንት ምጽሓፍ ናቱን ሰዓብቱን ኣተግበርቱን ተልእኾ ኢዩ። ኣይገርምን።

“ሳላኺ“ “ማርያም” ዝተሳእነ የልቦን። ብዙሕ ነገር ተፈሊጡ። የቐንየልና። ን”ስም” መርበብ ካብቲ ዘይተኣገድክሉ ቦታ ኮይንኪ ክትወስዲ እንተኺኢልኪ፣ ተማልእና። 

ዓምዲ “ናዕታ” ዶብና ትሰግሩ ኣለኹም ስለዝበሉና ብዛዕባ’ዚ ዝያዳ ካብ ምጽሓፍ ተቖጢብና ኣለና። እንታይ ክንገብር ዘመን ህ.ግ.ደ.ፍ. መንደፍ።